Tiʼ le máaxoʼob kʼaʼaytik le Reinooʼ:

JÁAN tuukulnakoʼon tiʼ le baʼax úuch tu jaʼatskabil viernes 2 tiʼ octubre tiʼ 1914. Koʼox aʼalikeʼ techeʼ tiʼ ka meyaj tu najil Betel Brooklyneʼ (Nueva York), kulukbalech teʼ comedor táanil tiʼ le ukʼuloʼ, táan a páaʼtik u kʼuchul sukuʼun Charles Russell. Chéen ken a wil u jeʼebel le joonajoʼ ku yokol túun le sukuʼunoʼ. Jeʼex suukil u beetkeʼ ku jáan jeʼeleleʼ ku yaʼalik: «¡Maʼalob kʼiin tiʼ tuláakleʼex!». Baʼaleʼ táanil tiʼ u kutaleʼ papaxkʼabnajeʼ ka tu yaʼalaj: «U kʼiinil le j-táanxel luʼumiloʼoboʼ tsʼoʼok u máan, u kʼiinil le máaxoʼob ku gobernaroʼoboʼ tsʼoʼok u xuʼulul». Techeʼ ku kiʼimaktal a wóol, tumen úuch joʼopʼok a páaʼtik u kʼuchul le kʼiin jeʼeloʼ. Ku joʼopʼol xan a papaxkʼab yéetel u maasil sukuʼunoʼoboʼ.

Tsʼoʼok u yúuchtal u yaʼal sukuʼun Russell le tʼaanoʼobaʼ. ¿Baʼaxoʼob tsʼoʼok u beetik u Reino Dios ichil tuláakal le kʼiinoʼob tsʼoʼok u  máanoʼ? Yaʼabkach baʼaloʼob. Jéeobaeʼ tsʼoʼok u meyaj le Reino tiʼ utiaʼal u limpiartik u kaajal yéetel u kaʼansik le máaxoʼob meyajtikoʼ. Tu jaʼabil 1914, chéen junpʼíitoʼob, baʼaleʼ bejlaʼeʼ tsʼoʼok u chukik óoliʼ ocho millones u túulaloʼob. ¿Bix tsʼoʼok u yáantkech le kaʼansaj ku tsʼáaik Jéeobaoʼ?

Yaʼab sukuʼunoʼobeʼ suuk u yaʼalikoʼob: «¡U carro Jéeobaeʼ jach túun chich u bin!». Lelaʼ jach tu jaajil beyoʼ. Baʼaleʼ desde tu jaʼabil 1914, u carro Jéeoba, wa u kaajal yaan teʼ kaʼanoʼ, tsʼoʼok u maas chichtal u bin, jeʼex ken a wil le táan a xokik le libroaʼ. Le sukuʼunoʼoboʼ tsʼoʼok u meyajtiʼob jejeláas baʼaloʼob utiaʼal u kʼaʼaytikoʼob le maʼalob péektsil tiʼ tuláakal yóokʼol kaab, jeʼex periódico, pancartaʼob, grabacionoʼob ku chaʼantaʼaloʼob yéetel ku yuʼubaʼal u tʼaanil, fotoʼob, tarjeta utiaʼal kʼaʼaytaj, gramofonoʼob, radio yéetel Internet.

Yéetel u yáantaj Jéeobaeʼ, bejlaʼeʼ ku páajtal k-beetik jóoʼsaʼaniloʼob láaj yaan u coloriloʼob ich maas tiʼ 670 idiomaʼob utiaʼal k-tʼox x-maʼ boʼolil tiʼ le máakoʼoboʼ. Yaʼab sukuʼunoʼobeʼ ku meyajoʼob utiaʼal u líiʼsaʼal u Najiloʼob Reino, u Najiloʼob Asambleaʼob yéetel u najiloʼob Betel teʼ tuʼuxoʼob yaan u modoil u kuxtal le máakoʼoboʼ bey xan teʼ tuʼux ku yilaʼal óotsililoʼ. Tsʼoʼoleʼ ken úuchuk junpʼéel loobileʼ yaʼab sukuʼunoʼob yéetel kiikoʼob ku binoʼob áantajiʼ, beyoʼ ku yeʼeskoʼob jach tu jaajil sukuʼunoʼob, tumen ku yáantajoʼob «tu kʼiiniloʼob yaj óol[al]» (Pro. 17:17).

Yaan kʼiineʼ u nuuktakil le religionoʼob yéetel uláakʼ máaxoʼob pʼekmiloʼonoʼ «ku beetkoʼob baʼaloʼob kʼaas tu yoʼolal aʼalmajtʼaan» wa ley utiaʼal u bin le gobiernoʼob t-contraoʼ, baʼaleʼ ku kiʼimaktal k-óol k-ilik maʼ tu béeytal baʼax ku tuklikoʼob, baʼaxeʼ ku «yáantaj utiaʼal u maas kʼaj óoltaʼal le maʼalob péektsiloʼ» (Sal. 94:20; Fili. 1:12).

Jach jatsʼuts k-ilik k-múul meyaj ta wéeteleʼex sukuʼuneʼex, tumen tuláakloʼon táan k-múuchʼ meyaj bey u palitsiloʼon Rey Jesucristoeʼ. Maʼ u tuʼubulteʼexeʼ k-yaabiltmeʼex. K-kʼáat óoltik tiʼ Jéeoba ka u yáanteʼex le baʼax ku yaʼalik le libroaʼ utiaʼal maʼ u xuʼulul a wilkeʼex jach nojoch baʼal le k-múuchʼ meyajtikeʼex Diosoʼ (Mat. 24:45).

K-aʼalikteʼex k-jach yaabiltmeʼex,

A sukuʼuneʼex,

Cuerpo Gobernante tiʼ u j-Jaajkunajoʼob Jéeoba