亲爱嘅王国传道员：

请想象一下，喺1914年10月2日星期五早上，你同布鲁克林伯特利家庭嘅其他成员一齐聚集喺餐厅，坐喺自己嘅座位度等罗素弟兄。冇几耐，餐厅嘅门开咗，罗素弟兄行入嚟。佢好似平时噉停低脚步，笑住同大家打招呼话：“咁多位，早晨！”不过，有啲唔同嘅系，佢冇即刻行到自己嘅主席位，而系拍咗几下手，发表咗一个令人振奋嘅宣布：“外邦人嘅日期已经结束；外邦列王嘅日子已经满咗喇！”真系好开心啊，因为呢一日你已经等咗好耐嘞！现场嘅每一位伯特利成员都好兴奋，热烈噉鼓掌，掌声不绝于耳。

 罗素弟兄作出呢个激动人心嘅宣布，到而家已经一百年嘞。自从宣布之后，上帝嘅王国取得嘅成就，系几咁辉煌啊！耶和华通过呢个王国逐步炼净同埋培训佢嘅子民。1914年，上帝嘅子民只有区区几千人，今日已经超过800万嘞。你从上帝王国提供嘅各种培训得到咗乜嘢益处呢？

今日，我哋经常听到弟兄话：“耶和华嘅天上战车正喺度前进紧！”呢句话讲得冇错。其实，自从1914年以来，象征耶和华天上组织嘅战车一直都喺度飞速前进。我哋仔细阅读呢本书，就可以睇出呢一点嘞。王国传道员用咗好多创新嘅方法将王国嘅好消息传遍全地，例如报章、宣传游行、幻灯片、见证卡、留声机、广播甚至互联网。

由于耶和华赐福，我哋而家能够以超过670种语言嚟出版吸引人嘅圣经书刊，而且免费分发。无论喺富裕嘅国家，定系喺资源有限嘅地区，都有志愿人员作出牺牲，参与王国聚会所、大会堂、分部设施嘅建筑工程。当有灾难发生嘅时候，充满爱心嘅弟兄姊妹就会即刻救助受灾嘅信徒，佢哋的确“为共患难而生”。（箴言17:17）

有时候，教士同其他人反对我哋，“以法令谋害”我哋。不过，事实一次又一次噉表明，反对者嘅错误举动“反而有利于传扬好消息”。呢一点，大大增强咗我哋嘅信心。（诗篇94:20；腓立比书1:12）

你哋系主人嘅“仆役”，我哋好荣幸可以同你哋一齐共事。我哋好爱你哋每一个人。我哋祈求上帝，希望呢本书帮助你哋更加珍视自己嘅属灵产业。（马太福音24:45）

祝安好！

你哋嘅弟兄

耶和华见证人中央长老团