Wene Awirinarani Nga Abatungusipa Kindo:

ONI BINGO tironi wa oni dagba agu aborokporo nga ga gu Betere du Brooklyn yo Rago Bisue wiso rogo Tanvuo 2, 1914. Oni sungu rogo gaoni basungo pati gu mbisa nga ga riahe wiso kina wai oni naasungo mbata tipa ka pido Wiriba Charles Russell ko da. Wakina ikpirogumba, ngbadimo za Wiriba Russell ki da. Ko ru tooni a wa sinoko nidu, na ki fu sene fu aborokporo nga ga Betere yo na ngbarago nga, “Wene wiso furoni dunduko.” Kuba gupai nga ko sungu rii gako kiti nibasa, ko ta beko na ki mangi nyanyakipa tingidapai nga: “Regbo aGendiria ima digo; gu zogarago nga ga gayo bakindo ima digo!” Gene bero wa ka mo hi gamo ngbarago te, mo aima digo ni pidi gi regbo re tipa gbanga regbo! Mo na aborokporo nga ga Betere yo dunduko, oni di gi pangbanga re kugume na ki tona ka ta beroni na ngbarago.

 Dungu agarã ima susa wa Wiriba Russell amangi gi wene tingidapai re. Ginihe Kindo namangihe naatona ti gu regbo re? Badungu apai! Rogo gu mbakadapai nga ga Kindo naabaha, Yekova aima digo ni kpuruwa gako aboro yeeye na kini raba yo, tona ti gu bete akutu aboro naadu rogo 1914 kada kuti aguyo du areme niima susa amirioni muambe. Wai du mo nagbia undo ti gu ngbatunga rabahe re?

Areme, wo awirinarani naape gupai dedede nga, “ga Yekova ngbagida naora aora!” na kina boro rengo du. Ono tie, gu rengo duho nga naatona rogo 1914, gu ngbagida narukuba gu ga Yekova papara riigbu du ngbangbaturũ yo re, aima digo ni oro ni kina boro nyanyakihe, a wa geda gi buku re sirisiri nika yugoho. Tipa i tungusi wene pangbanga rogo zegino dunduko, abatungusipa Kindo ima mangasunge na ngbatunga ahe ni bakiakia, kodihe na awaraga apangbanga, ndu bangiri agene na awaraga ti ngbaduyo, asura (photo), karte dezirepai, fonoo, radio, gbiati Internet.

Mbikopa fu Yekova maku kurii gi sunge re, ani awere na rengba berani ka kusa gaani awaraga rogo afugo naima susa 670 na kini gamuhe ti aboro dunduko zanga sana yo tipa marã. Awirina nafutiyo tipa ka meka aBambu Kindo, aBambu Bakere Dunguratise, na abe-basunge, rogo agu aringara niima kumuko gbiati agu du aboro rogoho na zingo marã. Na ho gberãngo amanga ni, agu awirina nga akumba na adee du na nyemuse naora ka undo awirinayo rogo agu aba re, ka yugo na ni nga ‘i avungu wirina tipa unda ti rago gberãngbi.’—Snz. 17:17.

Ti gu kura aregbo, abarumbatayo rogo pambori na gu kura aboro “narungosi rani rogo andiko yo,” ono si nanyakasa kina gaani idapase ka bi wai gu gayo gbegberẽ mangapai re asatihe sa “turusa wene pangbanga ku mbata yo.”—Tam. 94:20; Frp. 1:12.

Si nipa ngbarago furani tipa kadu na oni wa sa nga awirinarani “aborokporo.” Ani naida oni ini gupai nga ani nakpinyemu roni ni bakerehe gbe. Gaani kpee du nga agu apai du rogo gi buku re undongo roni aundo oni du na tambuahe tipa gu gaoni ũkumbo nga ga toro susi gu nidu mbata.—Mt. 24:45.

Apai du na oni dunduko wenengai, ani du nga

Awirinaroni,

Riigbu Bipasunge Nga ga aDezire Yekova