LAS roha ni parsiajar Bibelta dung diantusi ibana ayat na jinahana. Laho paposhon rohana, disungkun ibana ma, ”Boi hita mangolu salelengna di tano on?” Huhut mengkel, dialusi donganmuna ma, ”Songon dia didok di ayat na tajaha i?” Ndang tardok ni parsiajar Bibel i be manang aha. Alai las do rohana mambege hatorangan i jala didok, ”Ndang hea do pe huboto on!” Diingot hamu ma muse, songon i do tongtong pangkilalaanna dung diboto goar ni Debata, i ma Jahowa.

Hea do dihilala hamu songon i? Godang do naposo ni Debata na mangkilala songon i. Ndang adong las ni roha na umbalga ala nunga tajalo hadiah, i ma pangantusion taringot tu hasintongan! Pingkirhon ma: Songon dia do umbahen na tadapot hadiah i? Dialusi ma sungkunsungkun i di bagian on. Dung taparsiajari songon dia hasintongan i lam tiur manondangi naposo ni Debata. Lam pos ma rohanta na tutu do pamarentaon ni Harajaon ni Debata. Saleleng 100 taon diurupi Jesus Kristus do naposo ni Debata asa mananda hasintongan.