YU stap mekem Baebol stadi long wan man. Ale, yutufala i ridim wan vas. !Man ya i sek! !Ae blong hem i bigbigwan! Hem i jes kasem save long mining blong vas ya. Hem i talem slo nomo se: “Tru ya, Baebol i talem se yumi save laef olwe long Paradaes. ?Hemia long wol ya?” Fren blong yu we i folem yu long stadi ya i smael, nao i talem se: “Hemia nao, olsem vas ya i talem.” Man ya i saksakem hed blong hem, from we hem i jes lanem wan bigfala samting. Hem i talem se: “!I neva gat wan man i soem vas ya long mi!” Yu yu tingbaot se, i no longtaem i pas, hem i talem sem tok ya taem hem i kasem save se God i gat prapa nem blong hem, Jehova.

?Olsem wanem? ?Samting ya i hapen long yu samtaem? Ating i hapen long plante man blong God. !Long taem olsem, yumi tingbaot se yumi kasem wan nambawan presen, hemia trutok! Be i gud yumi tingbaot tu se: ‘?Mi mi kasem presen ya olsem wanem?’ Long haf ya, bambae yumi tokbaot olsem wanem God i stap talemaot ol save sloslo long ol man blong hem. Samting ya i soemaot se Kingdom blong God i wan prapa gavman we i stap rul. Long handred yia we i pas, King blong Kingdom ya, Jisas Kraes, i mekem plante samting blong givim stret save long ol man blong God.