MIKISLAP ang mga mata sa imong Bible study dihang nasabtan niya ang kahulogan sa tekstong inyong gibasa. Dayon siya miingon, “Buot bang ipasabot nga ang Bibliya nagtudlo nga kita mabuhi sa Paraiso sa walay kataposan—dinhi mismo sa yuta?” Mipahiyom ang imong partner sa pagsangyaw ug miingon, “Aw, unsay imong nabasa sa Bibliya?” Ang estudyante naglingolingo ug miingon, “Nganong wa man mi tudloi niini?” Nahinumdom kang kini sab ang iyang gisulti pipila ka semana nga milabay, dihang nasayran niyang Jehova ang ngalan sa Diyos.

Nakaeksperyensiya ka na ba niini? Kini ang eksperyensiya sa daghang alagad ni Jehova. Nagpahinumdom gyod kini sa nadawat natong bililhong gasa—ang kahibalo sa kamatuoran! Pero yuna pa: Sa unsang paagi nadawat nimo kini? Atong susihon kini niining seksiyona. Ang anam-anam nga pagkadawat sa katawhan sa Diyos ug espirituwal nga kahayag tin-awng ebidensiya nga tinuod ang Gingharian sa Diyos. Sulod sa usa ka siglo, gipaneguro sa Hari niini, si Jesu-Kristo, nga matudloan sa kamatuoran ang katawhan sa Diyos.