ÈDE dzesii be wò Biblia nusrɔ̃vi ƒe nu ku ŋutɔ esi wòse mawunyakpukpui aɖe si miexlẽ ku ɖe Paradiso mɔkpɔkpɔa ŋu la gɔme. Egbɔ fũu, eye wògblɔ be, “Ðe miele gbɔgblɔm be ele Biblia me be míava nɔ agbe tegbee le Paradiso me le anyigba sia dzia?” Ame si mia kplii miele gbeadzi la ko alɔgbɔnu vie hegblɔ be, “Ye ma wò ŋutɔ nèxlẽ le Biblia me ɖe, alo?” Nu bliboa wɔ dɔ ɖe nusrɔ̃via dzi wòʋuʋu ta hegblɔ be, “Ewɔ nuku nam ŋutɔ be nyemese nya sia kpɔ o!” Enumake èɖo ŋku edzi be egblɔ nya ma tɔgbi kwasiɖa ʋɛ aɖewo va yi esi wòva nya zi gbãtɔ be Mawu ƒe ŋkɔe nye Yehowa.

Ðe ame aɖe wɔ nu alea nèkpɔ kpɔa? Mawusubɔla geɖewo kpɔ eteƒe enuenu. Nuteƒekpɔkpɔ siawo tɔgbi ɖoa ŋku edzi na mí vevie be kesinɔnu gã aɖee wònye su mía si be míedze si nyateƒea. Gake tɔ vie nàbu nya sia ŋu kpɔ: Aleke kesinɔnu ma wɔ va su asiwò? Míadzro nyabiase sia me le agbalẽa ƒe akpa gbãtɔ sia me. Ale si gbɔgbɔmenumekɔkɔ le Mawu ƒe amewo si sum vivivi la nye kpeɖodzi sẽŋu be Mawu Fiaɖuƒea le dzi ɖum vavã. Ƒe alafa ɖekae nye esia la, Fiaɖuƒea ƒe Fia Yesu Kristo le egbɔ kpɔm vevie be woafia nyateƒea Mawu ƒe amewo.