EYEN ukpepn̄kpọ Bible fo enen̄ede okop idatesịt ke ini itie N̄wed Abasi oro mbufo ẹkekotde an̄wan̄ade enye. Enye obụp fi sụn̄sụn̄ ete, “Ndi ikọ fo ọwọrọ ke Bible ekpep ke nnyịn imekeme ndidu uwem ke Paradise ke nsinsi ke isọn̄ emi?” Eyenete oro asan̄ade ye afo ke an̄wautom atuak inua imam onyụn̄ obụp enye ete, “Bible ọdọhọ didie?” Sia n̄kpọ emi ayan̄ade eyen ukpepn̄kpọ oro ifiọk, enye ofụn̄ ibuot ke ntak n̄kpaidem onyụn̄ ọdọhọ ete: “Edi ntak emi akanam owo mîkpepke nnyịn n̄kpọ emi?” Emeti ke enye ama etịn̄ n̄kpọ ntem urua ifan̄ emi ẹkebede, akpa ini emi enye ọkọfiọkde ke Abasi ekere Jehovah.

Ndi akanam orụk n̄kpọ oro etịbe ọnọ fi? Esitịbe ọnọ ediwak owo ke otu ikọt Abasi. N̄kpri n̄kpọ ntem ẹkeme nditi nnyịn mban̄a ọsọn̄urua ẹnọ oro ẹnọde nnyịn—oro edi, ifiọk akpanikọ! Edi tuak da kere ise: Afo akanam didie enyene enọ emi? Iyọbọrọ mbụme oro ke ikpehe emi. Nte ikọt Abasi ẹsisan̄ade ẹfiọk akpanikọ nsịtnsịt enen̄ede owụt ke Obio Ubọn̄ Abasi ke akara. Ke isua ikie idahaemi, Jesus Christ, Edidem Obio Ubọn̄ emi ke anam ẹkpep ikọt Abasi akpanikọ.