IWASEWASE 1
Ka Dina ni Matanitu—Vakarautaki ni Kakana Vakayalo
O RAICA ni marau o nomu vuli iVolatabu ni taura rawa na ibalebale ni tikinivolatabu drau wilika vata. E tukuna mai vakamalua: “Kena ibalebale e kaya na iVolatabu ni rawa meda bula tawamudu ena Parataisi ena vuravura ga qo?” E matadredredre nomu itokani drau lako vata qai tukuna: “Na cava o se qai wilika ga qori ena iVolatabu?” E kurea ga na uluna ena levu ni nona kurabui qai kaya: “Au sega sara tu ga ni kila qo e liu!” O nanuma lesu ni a tukuna tale ga e dua na ka va qori ena vica na macawa sa oti ni sa qai kila ni yaca ni Kalou o Jiova.
O sa bau sotava qori? E levu na tacida era sa sotava oti. Eso na ka va qo eda lai vakasamataka kina na isolisoli talei ni noda kila na ka dina! Vakasamataka mada: O rawata vakacava na isolisoli qori? Eda na dikeva na kena isau ena iwasewase qo. Na veivakararamataki vakayalo e vakarautaki vakalalai vei ira na tamata ni Kalou e ivakadinadina levu ni tiko dina na Matanitu ni Kalou. Sa oti qo e 100 na yabaki nona vakadeitaka tiko na Tui ni matanitu, o Jisu Karisito mera vakavulici ena ka dina na tamata ni Kalou.
ENA IWASEWASE QO
WASE 3
Vakatakila o Jiova na Nona iNaki
A okati ena inaki taumada ni Kalou na Matanitu ni Kalou? E vakararamataka vakacava o Jisu na ka me baleta na Matanitu ni Kalou?
WASE 4
Vakacerecerea o Jiova na Yacana
Cava sa cakava na Matanitu ni Kalou me baleta na yaca ni Kalou? O na vakarokorokotaka vakacava na yaca i Jiova?
WASE 5
Vakatakila na Tui na Matanitu ni Kalou
Kila vinaka na Matanitu ni Kalou, ira na veiliutaki, ira na vakarurugi ena kena lewa kei na ibalebale ni yalodina.