DILADILA nee ngeno omukonakonimbibeli woye te ku tale nonghumwe eshi a uda ko eityo lomushangwa oo mwa lesha naye. Ndee ta ti, “Owa hala okutya, Ombibeli otai hongo kutya ohatu dulu oku ka kala moparadisa fiyo alushe, oku kombada yedu?” Oo tamu longo pamwe naye okwe limemesha ndele ta ti, “Ombibeli otai ti ngahelipi?” Ndele omukonakoni ta piki komutwe nonghumwe inene ta ti, “oshikumwifi shili, osho inandi shi uda nande onale!” Opo nee owa dimbuluka kutya okwa li e linyenga monghedi ya faafana oivike opo ya di ko eshi a li e lihonga oshikando shotete kutya edina laKalunga oJehova.

Mbela owa shakeneka nale onghalo ya tya ngaho? Vahapu vomoshiwana shaKalunga ove i shakeneka. Ope na oinima inini oyo tai dulu oku tu dimbulukifa noupu shi na sha noshali ya denga mbada oyo twa pewa: eshiivo lokushiiva oshili! Lipula kutya, osha enda ngahelipi opo oshali ya tya ngaho i fike kwaame? Ohatu ka kundafana shi na sha nepulo olo moshitukulwa eshi. Onghedi omo oshiwana shaKalunga sha ninga exumokomesho meudeko loinima yopamhepo oi li oumbangi kutya Ouhamba waKalunga ou li wolela. Moule wefelemido, Ohamba yOuhamba oo, Jesus Kristus oya kala tai shilipaleke kutya oshiwana shaKalunga osha hongwa oshili.