EIE u mona kuila o dixibulu diê dia Bibidia ua sanguluka kiavulu mu ku tendela kiambote kibatulu kia Mikanda ikola ki mua tange kumoxi. Muéne u zuela: “Ua mu zuela kuila o Bibidia i longa kuila tu tena ku kala ni muenhu ua kalelaku mu Palaízu—bhabha muene mu ixi?” O muboki ua tundu né mu ukunji uelela bhofele, anga u zuela: “Ihi i ua tange mu Bibidia?” O dixibulu u zambesa o mutué uê ni ku diuana, anga u zuela: “Nuka a ngi longele o kidi kiki!” Eie u lembalala kuila semana ku dima, muéne ua zuelele kiá kiki, kioso kia di longo mu veji ia dianga kuila o dijina dia Nzambi, Jihova.

O kuila kiki kia bhitile kiá n’eie? Mundu uavulu ua Nzambi ua dibhana kiá ni maka enhá. Ima iofele i tena ku tu bhangesa ku lembalala o ujitu ua dikota u tua tambula—o kuijiia kua kidi! Xinganeka hanji: Kiebhi o ujitu iú kia bhixila ko kuê? Mu mbandu íii tua-nda di longa o kibhuidisu kiki. O ukexilu ua mundu ua Nzambi ua ku jimbulula o kidi mu ukexilu ua nzumbi, ulondekesa kuila o Utuminu ua Nzambi ua kidi muene. Tundé m’ukulu, o Sobha ia Utuminu Jezú Kristu, uene mu bhangesa kuila o mundu ua Nzambi a longa o kidi.