KIPUNGU 1
Bukine Bwaamba pa Bufumu
MWAMONA ye mufunjisha Baibolo waumvwa bulongo pa kumvwisha mwatala kinembelo kyo mwatanga. Waipuzha amba, “Nanchi Baibolo ufunjisha kuba’mba twakonsha kwikala mu Paladisa ponka pano pa ntanda myaka ne myaka nyi?” Ye muji nanji mu mwingilo wamwemwesela ne kukumbula amba “Kyawama, twaji kufunda amba ka mu Baibolo?” Ubena kufunda Baibolo wakumya ne kwitaba na mutwe, waamba’mba, “Kyo kimye kitanshi kufundapo bino!” Mwavuluka amba waambile byonka bino milungu yapitapo, byo ayukile kimyetu kitanshi amba jizhina ja Lesa, Yehoba.
Nanchi bintu bya uno mutundu bya kimumwekelapo kala nyi? Bantu ba Lesa bavula bya kibamwekelapo kala. Bintu bimo byakonsha kwituvululako kintu kya buneme kyo betupa ko kuba’mba kuyuka bukine! Akilangulukai pa kino, mwayukile byepi buno bukine? Mu kino kipungu tusakwisambapo pa buno bwipuzho. Jishinda bantu ba Lesa jo batambwilamo lutundaiko lwa ku mupashi jimwesha kuba’mba Bufumu bwa Lesa bwa kine. Pa myaka kitota kimo yapitapo, Mfumu wa buno Bufumu aye Yesu Kilishitu umona kuba’mba bantu ba Lesa babena kufunda bukine.
BIJI MU KINO KIPUNGU
KITANGO 3
Yehoba Wasolola Nkebelo yanji
Nanchi Bufumu bwa Bumesiasa bwajinga lubaji lwa nkebelo ya Lesa nyi? Yesu walumbulwile byepi nkebelo ya Lesa?
KITANGO 4
Yehoba Utumbijika Jizhina Janji
Nga Bufumu bwaubapo byepi pa jizhina ja Lesa? Mwakonsha kwivwangamo byepi mu kutumbijika jizhina ja Yehoba?
KITANGO 5
Mfumu Wasamisha Kyeya pa Bufumu
Umvwishai byo kilumbulula kwikala wa kishinka ku Bufumu bwa Lesa, bakalama ne bakalamwanga, ne bikebewa pa kwikala wa kishinka.
