CHIHANDA 1
Muchano waWangana—Kutandakanyisa Kulya chaKushipilitu
ACHISHINGANYEKENU muli nakutwaminyina chilongesa chaMbimbiliya. Jino hakumutangila chisoneka chimwe, mwawahilila nakwamba ngwenyi, “Munakulumbununa ngwenu Mbimbiliya yanangula ngwayo natukatwama muPalachise hano hamavu myaka yosena tahi?” Ndumbwenu munakuzata nenyi mwamwesamwesa kukanwa nakukumbulula ngwenyi, “Omu mukiko yinahanjika Mbimbiliya, nyi mweka?” Ou chilongesa mwalinyikumuna kumutwe nakwamba ngwenyi, “Lelo likiko likumbi lyatete kwivwa muchano kanou.” Namwanuka jino ngwenu omu mukiko ahanjikile omu alinangwile halwola lwatete ngwenyi, lijina lyaKalunga ikiye Yehova.
Uno nayenu mwaliwanaho lyehi navatu vangana tahi? Vatu jaKalunga vavavulu vanakuliwananga navatu vangana muwande. Vyuma vyakufwana ngana vyeji kutwanukisa wana wakulipwila vatuhana wachinyingi chakutachikiza muchano. Achishinganyekenu: Uno muchano kana mwautachikijile ngachilihi? Chihula kana chikiko natushimutwila muchihanda chino. Vatu jaKalunga vanalinangulanga muchano chikoki chikoki, kahechi chinasolola hatoma nge Wangana waKalunga unakuyula. Hamyaka 100 yinahichimo, Yesu Kulishitu uze apwa Mwangana waWangana kanou natwaminyinanga mulimo wakunangula muchano vatu jaKalunga.
MUCHIHANDA CHINO
KAPETULU 3
Yehova Ajimbwile Vyuma Ajina
Uno hakavanga Kalunga ajinyine ngwenyi kupwenga Wangana tahi? Yesu alumbunwine ngachilihi muchano waWangana?
KAPETULU 4
Yehova Mwazezula Lijina Lyenyi
Vyuma muka unatesamo Wangana halijina lyaKalunga? Vyuma muka mwatela kulinga mangana mulingise lijina lyaKalunga kupwa lyajila?
KAPETULU 5
Mwangana Mwavakafwa Vevwishise Wangana
Fwilenu kutachikiza Wangana waKalunga, navamyangana, navaze naukayula, navyuma atela kulinga mutu numba apwenga wakushishika.
