PAR ane ni ipuonjo ng’ato Muma. Ineno ka wengene rieny sama tiend ndiko moro odonjone maber. Kae to openji niya: “Kare Muma puonjo ni wanyalo dak e Paradiso e piny kae nyaka chieng’?” Jalendo ma un-go e puonjruogno dwoke ni: “Donge mano e gima waa neno e Muma?” Japuonjreno yiengo wiye kowuoro ahinya. Owacho ni, “Awuoro gimomiyo pok nawinjo gima kama nyaka nene!” E sechego, ichako paro chieng’ moro ma bende nowachoe weche ma kamago ka ne ohango fwenyo ni Nyasaye nyinge Jehova.

Be gima chal kamano osetimoreni sama ipuonjo ng’ato Muma? Gima kamano osetimore ne jotich Nyasaye mang’eny. Mano en achiel kuom gik madongo ma paronwaga ni adiera ma wasepuonjore en mwandu makende. Par ane matin: Ere kaka ne wayudo adiera? E kare mokwongoni, wabiro nono dwoko mar penjono. Yo ma jotich Jehova osebedo ka dhi nyime yudogo ler mar adiera en gima nyiso gadier ni Pinyruodh Nyasaye nitie. Kuom higni 100 kama, Ruoth Yesu Kristo osebedo ka konyo jo Nyasaye ng’eyo adiera momedore.