KALA ando wa fa wu wete omukonakonimbiimbeli gwoye ti imemeha sho u uvu ko ovelise yontumba ndjoka mwa zi nokulesha naye. Ye ota ti: “Tashi ti Ombiimbeli otayi ti otatu vulu okukala nomwenyo sigo aluhe kombanda yevi mOparadisa?” Ye ngoka tamu longo pamwe naye ote mu pula: “Ovelise oya ti ngiini tuu?” Ye omukonakoni oti ipuku komutse ta ti: “O! Oshike omusita gwetu inee shi tu longa?” Oto dhimbulukwa wo kutya oshikando sha zile ko konima sho i ilongo kutya edhina lyaKalunga oJehova, osho wo a pulile ngaaka.

Mbela owu uva nale omuntu ta ti ngaaka? Aapiya yaKalunga oyendji oye shi uva. Oshinima shika ohashi tu dhimbulukitha kutya otwa pewa omagano omawanawa gokukala twa tseya oshili! Ihe dhiladhila owala nkene she ende wu mone oshili. Oshinima shoka otashi ka kundathanwa moshitopolwa shika. Omukalo moka uuyelele woshili we ende tawu yelele oshigwana shaKalunga otagu holola kutya Uukwaniilwa waKalunga epangelo lyolela. Omukwaniilwa gwUukwaniilwa mboka, Jesus Kristus, okwa kala uule woomvula ethele ta shilipaleke kutya oshigwana shaKalunga otashi longwa oshili.