NAKO ubona ofunda naye iBhayibheli ahlahla amehlo sakuthaba njengombana alemuka umtlolo enisanda ukuwufunda ukuthi utjho ukuthini. Akubuze-ke, “Uzangitjela ukuthi vele iBhayibheli lithi siyokuphila isiphelani ePharadeyisi—khona la ephasini?” Bese kuthi lo okhamba nawe abobotheke njengombana athi, “Kanti wena uzweni nawufunda?” Umfundi lo, atjho sakubilayela nakathi, “Angikholwa ukuthi ngimi lo othoma ukuzwa into enjengale!” Wena-ke bese uyakhumbula ukuthi akutjhokokhu akathomi ukukutjho, wakwenza namhla umtjengisa kokuthoma ibizo lakaZimu elithi Jehova.

Yakhe yenzeka na into enjengaleyo kuwe? Kwabanengi abantu bakaZimu yakhe yenzeka. Zimbalwa khulu izinto ezingasikhumbuza ukuthi konje sinesipho esihle kangaka sokwazi iqiniso! Kodwana khewujame kancani uzibuze ukuthi wena wasifumana njani isiphweso. Engcenyeni le, kuzodenjwa yona indaba leyo. Indlela abantu bakaZimu abalifumene ngayo iqiniso, ibufakazi bokuthi umBuso kaZimu ngewamambala, begodu seyilikhulu iminyaka, iKosi yakhona uJesu Krestu yenza isiqinisekiso sokuthi abantu bakaZimu bafundiswa iqiniso.