BO STUDIANTE su cara ta cuminsa briya segun cu e ta compronde kico e texto biblico cu boso a caba di lesa hunto ta nifica. E ta puntra na un manera pensativo: “Bo kiermen cu Bijbel ta bisa cu nos por biba pa semper den Paradijs? Aki riba Tera mes?” Cu un smile, e ruman cu ta compaña bo ta puntr’e: “Wel, kico bo a lesa den Bijbel?” Sorprendi, e studiante ta sacudi su cabes, bisando: “Mi no por kere cu nunca ningun hende no a siña mi esaki.” Anto bo ta corda cu algun siman pasa el a bisa e mesun cos ora el a haya sa pa prome biaha cu e nomber di Dios ta Jehova.

E tipo di experencianan ey ta un di e cosnan cu mas ta laga nos mira ki un regalo precioso nos a ricibi, esta, conocemento di e berdad. Hopi ruman a yega di tin un experencia asina. Abo tambe? Pero para keto un rato y puntra bo mes: Con e regalo ey a yega cerca mi? Nos lo analisa e pregunta ey den e seccion aki. E pueblo di Dios a haya comprondemento spiritual gradualmente. E manera cu esey a tuma luga, riba su mes caba, ta un prueba convencente cu e Reino di Dios ta real. Pa 100 aña caba, Hesucristo, Rey di e Reino ey, ta percurando pa e pueblo di Dios siña e berdad.