IU LUKIM Bible study blo iu barava smile taem hem minim wanfala scripture wea iutufala readim. Then hem ask, “Iu minim, Bible storyim bae iumi stap lo Paradaes lo disfala earth for olowe?” Brata wea waka witim iu smile and sei, “Wanem nao iu readim lo Bible?” Study blo iu sapraes and hem barava hapi and sei, “Iaman, mi nating savve lo diswan bifor!” Then iu tingim, samfala week go pas hem talem sem samting tu taem hem lane abaotem nem blo God, hem Jehovah.

Waswe, enitaem iu kasem kaen experience olsem? Staka brata and sista kasem. Olketa kaen samting olsem savve mekem iumi tinghae lo barava spesol present wea iumi kasem, hem nao for savve lo truth! Tingim diswan, hao nao gogo iu kasem datfala present? Lo disfala sekson iumi bae story raonem datfala kwestin. Wei wea pipol blo God isisi minim gud truth, showimaot klia hao Kingdom blo God hem wanfala real gavman. For winim handred year finis, Jesus Christ wea hem King, hem gohed for mekem pipol blo God for savve lo truth.