BÂ SO mo diko mbeni versê na zo so mo yeke manda Bible na lo, na mo bâ tongana nyen lê ti lo azi na ngoi so lo gbu nda ti versê ni so mo londo ti diko so. Lo tene na mo, lo tene: “Mo ye ti tene so Bible afa so e yeke duti na yâ ti paradis ni ge na sese so?” Ita so ayeke na tere ti mo ahe ngia, na lo tene na zo ni: “Ti mo, versê so mo londo ti diko so atene nyen?” Wamandango ye ni ahinga tënë ti tene ape, lo yengi li ti lo, lo tene: “A fa na mbi mara ti tënë so lâ oko ape!” Mo dabe ti mo so lo sara mara ti tënë tongaso kozo awe na ngoi so lo ga ti hinga so iri ti Nzapa ayeke Jéhovah.

Mara ti ye so asi na mo awe? A si na awakua ti Jéhovah mingi. A dabe ti e so e yeke na mbeni pendere matabisi so mara ni ayeke use ape: a yeke so e hinga tâ tënë. Me bâ si, e wara pendere matabisi so tongana nyen? Na yâ ti mbage so, e yeke hasa yâ ti tënë so. Na ngoi so e yeke bâ lege so Jéhovah azi lê ti awakua ti lo yeke yeke, e yeke bâ polele so Royaume ti Nzapa ayeke tâ ye biani. Teti ngu ngbangbo oko, Gbia ti Royaume ni asara kue ti tene a fa gi tâ tënë na awakua ti Jéhovah.