UA E vaaia le sagisagi fiafia mai o lau tagata aʻoga, a o faasolo ina malamalama i se mau o loo oulua faitauina. Ua ia faapea mai: “O lona uiga o loo faapea mai le Tusi Paia e mafai ona tatou ola e faavavau i le lalolagi?” Ua soisoi lau paga ma faapea atu: “Ae o le ā le faamatalaga a le Tusi Paia?” Ua maofa le tagata aʻoga ma faapea mai: “Ou te leʻi aʻoaʻoina muamua lenei manatu.” Peitaʻi, e te manatua na ia faia foʻi lenā faamatalaga i nai vaiaso ua mavae, i le taimi muamua na ia iloa ai o Ieova le suafa o le Atua.

E mautinoa ua tupu lenā mea i le toʻatele o tagata o le Atua. Pe a tutupu mea faapena, e faamanatu mai ai iā i tatou le meaalofa tautele ua tatou mauaina, o le poto saʻo e faatatau i le upu moni. Na faapefea ona tatou maua lenā meaalofa? O le a taliina lenā fesili i lenei vaega. O le auala ua faasolosolo ai ona maua ai e tagata o le Atua meaʻai faaleagaga, ua faamaonia mai ai le moni o le Malo o le Atua. Ua silia i le 100 tausaga, o faamautinoa pea e le Tupu o Iesu Keriso, o loo aʻoaʻoina e tagata o le Atua le upu moni.