U VONA xichudeni xa wena xa Bibele xi tsaka loko xi twisisa nhlamuselo ya tsalwa leri ma ha ku hetaka ku ri hlaya swin’we. Hi ku nonoka, xi ku, “Xana u vula leswaku Bibele yi dyondzisa leswaku hi ta hanya eParadeyisini hilaha ku nga heriki​—laha misaveni?” Makwerhu loyi u fambaka na yena ensin’wini wa n’wayitela kutani a ku, “I yini leswi u swi twisiseke loko u hlaya Bibele?” Hi ku hlamala, xichudeni xi hlakahla nhloko kutani xi ku, “A ndzi kholwi leswaku a ndzi si tshama ndzi dyondzisiwa hi mhaka leyi!” Wa swi tsundzuka leswaku xi tshama xi vula marito yo fana ni wolawo eka mavhiki ma nga ri mangani lama hundzeke, loko xi sungula ku twa leswaku vito ra Xikwembu i Yehovha.

Xana u tshame u hlangana ni xichudeni xo fana ni xexo? Vanhu vo tala va Xikwembu va hlangane ni xichudeni xo tano. Swilo swi nga ri swingani swi nga hi tsundzuxa nyiko ya risima leyi hi nyikiweke yona​—ku nga vutivi bya ntiyiso! Ehleketisisa hi mhaka leyi: Xana u yi kume njhani nyiko yoleyo? Eka xiyenge lexi, hi ta tlhuvutsa xivutiso xexo. Ndlela leyi vanhu va Xikwembu va pfuniweke ha yona hakatsongo-tsongo ku twisisa ntiyiso i vumbhoni bya leswaku Mfumo wa Xikwembu i wa xiviri. Se ku hele dzana ra malembe, Hosi ya wona, Yesu Kreste, yi ri karhi yi tiyisekisa leswaku vanhu va Xikwembu va dyondzisiwa ntiyiso.