U WONA a nghohe ya xigonzani xa wena xa Biblia na yi tala hi kutsaka a xikhati lexi xi zwisisako a mutsalo ma ha hi ku wu gonzako. Hi kunonoka, xona xi ngalo, “U ngalo a Biblia gi gonzisa lezaku hi nga hanya Paradiseni kala kupinzuka — kwalaha misaveni leyi?” Loyi u fambisako naye a xigonzo lexo i nwayitela a guma aku, “Zini u nga zi wona lomu ka Biblia?” Na xi nga zi kholwi, a xigonzani xi ninginiza hloko hi kuhlamala xiku, “Za nzi karatela ku zi kholwa hakuva cima a nzi se zizwa!” Zalezo, u alakanya lezaku ka maviki ma hunzileko i ku byelile zo fana ni lezo a xikhati a nga tiva lezaku a vito ga Nungungulu hi Jehova.

Xana lezo za tshuka zi ku humelela? A kutala ka vanhu va Jehova va tshuka va humelelwa hi zona. Zilo zi tsongwani zi hi alakanyisako hi kudlunyatekileko a xinyikiwo xa lisima lexi hi nga naxo: a wutivi ga lisine! Nyimanyana u alakanyela lezi: Xi chikelisile kuyini ka wena a xinyikiwo lexo? Ka xipanze lexi hi ta hlamula a xiwutiso lexo. A ndlela leyi a vanhu va Nungungulu va ku kumisileko zona a kuwoningelwa ka moya hi kutsongwani-kutsongwani xikombiso xo hanya xa lezaku a Mufumo wa Nungungulu ngwa lisine. Hi xipimo xa zana ga malembe, a Hosi ya wona, Jesu Kristu, yita na yi maha zontlhe zi kotekako lezaku a vanhu va Nungungulu va gonzisiwa a lisine.