TIYELEZGERE kuti uyo mukusambira nayo Baibolo wazizikika na fundo ya mu Malemba iyo mwadumbiskana. Ndipo wamufumbani kuti: “Kasi mbunenesko nadi kuti tizamukhala mu Paradiso kwamuyirayira pano pa charu chapasi nga umo Baibolo layowoyera apa?” Mubali uyo muli mose mu uteŵeti wakumwemwetera ndipo wakuti: “Kasi Baibolo lati wuli?” Msambiri winu wakupulikiska yayi ndipo wakupukunya mutu, wakuti, “Nkhugomezga yayi, nkhakwamba kupulika fundo iyi!” Ndipo pamasinda mukukumbuka kuti sabata yamara napo wakayowoya nthena mwati mwamuphalira kuti zina la Chiuta ni Yehova.

Kasi vyanthena ivi namwe vili kumuchitikiranipo? Ŵanandi vikuŵachitikira. Fundo iyi yikutikumbuska kuti tili na chinthu chakuzirwa chomene, uwo mbunenesko wa mu Baibolo. Jifumbani kuti: Kasi vikenda wuli kuti nimanye unenesko? Tisandenge fumbo ili mu chigaŵa ichi. Umo ŵanthu ŵa Chiuta ŵawovwilikira kuti ŵamanye unenesko, mbukaboni wakuti Ufumu wa Chiuta ni boma lanadi. Sono pajumpha vyaka 100 kufuma apo Yesu Khristu wakaŵira Themba. Nyengo yose iyi, Themba ili lawovwira ŵanthu ŵa Chiuta kuti ŵamanye makora unenesko.