E ITE roa oe i te oaoa i roto i te mata o te taata ta oe e haapii atu ra i te Bibilia ua taa anaˈe ia ˈna te irava ta orua i taio mai nei. E na ô mai oia: “Te auraa anei ïa e te haapii ra te Bibilia e e nehenehe tatou e ora i roto i te paradaiso e a muri noa ˈtu, i ǒ nei i te fenua?” E ui atu te taata poro tei apee mai ia oe: “Eaha ta oe i taio mai nei i roto i te Bibilia?” E tairiiri te piahi i to ˈna upoo no te maere, a na ô ai: “A tahi ra vau a ite ai i teie haapiiraa!” Haamanaˈo atura oe e tera atoa ta ˈna i parau tau hebedoma aˈenei i to ˈna iteraa e o Iehova te iˈoa o te Atua.

Mea rahi te tavini a te Atua tei farerei i teie tupuraa. O oe atoa paha. Mea iti te mau mea e haamanaˈo roa mai i te ô faufaa mau i horoahia mai: te iteraa i te parau mau! Mea nafea taua ite ra i te taeraa mai? E pahono mai teie tuhaa. Ua haamaramarama riirii noa te Atua i to ˈna nunaa, a papu maitai atu ai ia ratou e te vai mau ra to ˈna Basileia. Mai 1914 mai â to Iesu Mesia, te Arii o te Basileia, haa-noa-raa ia haapiihia te parau mau i te nunaa o te Atua.