RORO nẹ oma nabọ vwerhen ohwo wọ vwẹ Baibol vwo yono ọke wọ vwọ nabọ dje ẹkpo ri Baibol ọvo fiotọ kẹ. Ememerha na, ọ da ta: “Kọyen wọ tanẹ Baibol na yonori nẹ a cha dia bẹdẹ vwẹ Iparadaisi vwẹ otọrakpọ na?” Ohwo wẹ vẹ ọyen gba yan na da hwẹ, ọ da nọ: “Die yen wọ mrẹre nẹ Baibol na tare?” Vẹ omavwerhovwẹn, ohwo wo yono na de kpogho uyovwin vwọrẹ igbevwunu, ọ da ta: “O gbevwunu nẹ mi ji nyo ota nana dẹvo-o!” Wọ da karophiyọ nẹ ọ je ta ọtiọyen idughwrẹn evo re wanre, ro ke vwo yono nẹ Jihova yen odẹ rẹ Ọghẹnẹ.

Wo rhiẹromrẹ ẹdia tiọyen jovwo re? Idibo ri Jihova buebun rhiẹromrẹ re. Erọnvwọn tiọyena sa nẹrhẹ a karophiyọ okẹ ọghanghanre ra vwọ kẹ avwanre, rọ dia erianriẹn rẹ uyota na! Di roro: Mavọ yen okẹ nana vwo te avwanre obọ? A cha fuẹrẹn onọ yena vwẹ ẹbẹre nana. Idjerhe rẹ idibo rẹ Ọghẹnẹ vwo vwo erianriẹn okokodo ri Baibol na djerephia nẹ Uvie rẹ Ọghẹnẹ muẹro dẹn. Vwẹ ẹgbukpe ujorin rọ wanre na, Jesu rọ dia Ovie na nabọ ruo rere idibo rẹ Ọghẹnẹ se vwo vwo ẹruọ rẹ uyota na.