Awanicisye kuti jwakulijiganya Baibulo jwawo akuwoneka kuti apikanicisye cenene kugopolela kwa lilemba lyagambile kuŵalanga kwene palijiganyo lya Baibulo. Kaneko akwawusya kuti, “Ana akugopolela kuti Baibulo jikusajiganya kuti tucitamaga mu Paladaiso mpaka kalakala pacilambo capasi pano?” Mjawo jwajesile najo mu undumetume akumwetulila ni akum’wusya jwakulijiganyajo kuti, “Ana apikene yamtuli pa lilembali?” Kaneko jwakulijiganya jula akupukunya mtwe mwakulosya kuti akusimonga, kaneko akusala kuti, “Yili yakusimonjesya kwabasi. Ligongo pangali juŵanjiganyisye yeleyi citandile.” Yeleyi yikwatendekasya kumbucila kuti jwalakwe jwaŵecetesoni yakulandana ni yeleyi, mawiki gakuŵalanjika gapitego ali amanyilile kwandaŵi jandanda kuti lina lya Mlungu lili Yehofa.

Ana wawojo pakwete payatendecele yeleyi? Ŵakutumicila ŵa Yehofa ŵajinji pakwete payatendecele. Yindu yakuŵalanjika yayitutendecele mpaka yitukumbusye cenene ya mtuka wapenani watupele Mlungu. Mtukawu uli kumanyilila usyesyene. Ni aganicisye ayi, Ana yakombolece camtuli kuti apate mtukawo? Mu mbali ajino citulole kwanga kwa ciwusyoci. Litala lyalyakamucisye ŵandu ŵa Mlungu kupikanicisya yiwundo yausimu mwapanandipanandi, uli umboni wamacili wakuti Ucimwene wa Mlungu uli usyesyene. Kwa yaka 100, Yesu Klistu jwali Mwenye jwa Ucimwenewu aŵele ali mkulolecesya kuti ŵandu ŵa Mlungu akwiganyidwa usyesyene.