JUMAJJ trabajir jan sarktajj uka uruw yatiyir sarañatak alwat wakichasisktajja. Qarit jikjjatasisajja, ‘yatiyir saräti janicha’ sasaw jisktʼastajja, cheqas samartʼañwa uka urojj munasma. Ukampis Diosat maytʼasisaw yatiyir sarañ amttajja. Ukürojj Diosar walja maranak serviri mä kullakampiw yatiyir misttajja, kunjamsa jupajj aguantawayi ukat kunja munasirisa uk uñjañajj chuymaruw purtʼtamjja. Ukat utat uta yatiykasajja, kunjamsa yaqha cheqanakan jakiri jilat kullakanakajj Bibliat apstʼat pachpa qellqatanakampi, ukat pachpa yatichäwinak yatiyasipki ukwa amuytʼtajja. Kunjamtï jumarojj yatiyir sarañatak wakichtʼapktamjja, ukhamarakiw jupanakarojj wakichtʼasiwayi, uksa amuytʼaraktawa. Chʼamañchtʼata ukat wali kusisitaw utar kuttʼtajja.

Jichhürunakanjja, yatiyasiñapatakiw Diosan Reinopajj jukʼamp yanaptʼaski. Qhepa urunakanjja, Oraqpachanwa yatiyasini sasaw Jesusajj arsuwayäna (Mat. 24:14). ¿Kunjamsa uka arunakajj phoqasiwayi? Aka jaljanjja, khitinakasa, kunjamsa ukat kunanakampis Diosan arunakap yatiyasiwayi ukwa yatjjataskañäni. Cheqas ukanakaw millón millón jaqenakarojja, ‘Diosan Reinopajj utjaskapuniwa’ sasin amuyapjjañapatakejj yanaptʼawayi.