İSTİRAHƏT günü səhər tezdən xidmətə getməyə hazırlaşırsınız. Ancaq özünüzü elə yorğun hiss edirsiniz ki, evdən çölə çıxmaq istəmirsiniz. Axı səhər yuxusunun yerini heç nə vermir! Lakin bu barədə dua edib xidmətə getmək qərarına gəlirsiniz. Birlikdə xidmət etdiyiniz yaşlı sadiq bacının dözümü və xeyirxahlığı sizi ruhlandırır. Siz xoş xəbəri ev-ev təbliğ edən zaman birdən dərk edirsiniz ki, bütün dünyadakı bacı-qardaşlarınız da eyni müjdəni təbliğ edir, eyni ədəbiyyatı paylayır və eyni təlimdən faydalanır. Evə qayıdanda yorğunluqdan əsər-əlamət qalmadığını hiss edirsiniz. «Nə yaxşı ki, evdə qalmamışam!» — deyə sevinirsiniz.

Bu gün təbliğ xidməti Allahın Padşahlığının ən başlıca işidir. İsa peyğəmbər qabaqcadan bildirmişdi ki, təbliğ işi axır günlərdə geniş vüsət alacaq (Mət. 24:14). Bu peyğəmbərlik necə yerinə yetir? Bu bölmədə biz təbliğ işində mühüm rol oynayan müjdəçilərdən, təbliğ üsullarından və istifadə olunan alətlərdən söhbət açacağıq. Həmçinin görəcəyik ki, bunlar milyonlarla insanlara Allahın Padşahlığının real hökumət olduğunu görməyə necə kömək edir.