SEKSIYON 2
Paghuhulit kan Kahadian—Pagpalakop kan Maugmang Bareta sa Bilog na Kinaban
SARONG aga na dai kang trabaho, amay kang nag-andam para sa ministeryo. Pero huling medyo pagal, nagduwa-duwa ka. Garo baga masiramon magpahingalo sa agang iyan! Pero namibi ka dangan nagdesisyon na magluwas. Nakaibanan mo an sarong maimbod na gurang nang sister, asin napahiro an puso mo huli sa pakatagal saka kabuutan niya. Asin mantang ihinuhulit mo sa harong-harong an mensahe kan katotoohan, naisip mo na ihinuhulit man ini kan mga tugang sa bilog na kinaban, gamit an parehong literatura, asin gabos nakikinabang sa parehong pagsasanay. Pag-uli mo, namatian mo na mas kuminusog ka. Maugmahon ka ta nagluwas ka!
Sa ngunyan, an Kristiyanong ministeryo an panginot na gibuhon kan Kahadian nin Diyos. Ihinula ni Jesus na sa huring mga aldaw magigin mahiwason an paghuhulit. (Mat. 24:14) Paano nauutob an hula niya? Sa seksiyon na ini, aaramon ta an dapit sa mga tawo, pamamaagi, asin mga kasangkapan na nagin mahalagang marhay sa Kristiyanong ministeryo, na nakakatabang sa minilyon sa bilog na kinaban na masabutan na tunay an Kahadian nin Diyos.
SA SEKSIYON NA INI
KAPITULO 6
Mga Tawo na Naghuhulit—Gikan sa Buot na Nagpepresentar an mga Ministro
Taano ta may kumpiyansa si Jesus na magkakaigwa siya nin sarong hukbo nin andam na mga parahulit sa huring mga aldaw? Paano mo ikakapahiling na iniinot mo an Kahadian?
KAPITULO 7
Mga Pamamaagi nin Paghuhulit—Paggamit Kaiyan Gabos Para Mapatotoohan an mga Tawo
Aramon an bagong mga pamamaagi kan mga lingkod nin Diyos para ipaabot sa pinakadakul na mapupuwede an maugmang bareta bago umabot an katapusan.
KAPITULO 8
Mga Kasangkapan sa Paghuhulit—Paggibo nin Literatura Para sa Pambilog na Kinaban na Langtad
Paano pinapatunayan kan pagtradusir niyato na suportado kita ni Jesus? Anong impormasyon dapit sa satong mga publikasyon an nagpapatunay sa saimo na totoo an Kahadian?
KAPITULO 9
Resulta nin Paghuhulit—An ‘Kaumahan Maputi Na Para sa Pag-ani’
Itinukdo ni Jesus sa mga disipulo niya an duwang mahalagang leksiyon dapit sa dakulang espirituwal na pag-ani. Ano an epekto kan mga leksiyon na ini sa sato ngunyan?
