SƆGƆMA joona i ka lafiɲɛlon na, i b’i yɛrɛ labɛnna waajuli baara kama. I be sigasigara sabu i sɛgɛnnin lo dɔɔni. A tun bena diya i ye ka to soo walisa ka lafiɲɛ! Nka, i ye delili kɛ ani i y’a latigɛ ka taga waajuli la. Waajuli kɛtɔ ni balima musokɔrɔba kantigi dɔ ye, a ka muɲuli n’a ka ɲumanya y’i dusu sɔrɔ. K’aw to waajuli la soo ni soo, i hakili jigira ko duniɲa kuru bɛɛ kɔnɔ, i balimaw b’o kibaro kelen lo fɔra mɔgɔw ye. Aw be baara kɛra ni gafe minw ye, u bɛɛ ye kelen ye ani aw bɛɛ ye fɔrɔmasɔn kelen lo sɔrɔ. I segira soo tuma min na, i y’a ye ko i ye fanga kura sɔrɔ. A diyara i ye kosɔbɛ sabu i ma to soo!

Bi, Masaya baara min kɔrɔtanin lo kosɔbɛ, o ye waajuli baara lo ye. Yezu tun kɔnna k’a fɔ ko laban loonw na, o baara bena se duniɲa yɔrɔ bɛɛ la (Mat. 24:14). O kiraya kuma be dafara cogo di? Minw b’o waajuli baara kɛra, u be tɛmɛna fɛɛrɛ minw fɛ k’o kɛ ani u b’o kɛra ni minan minw ye, u bɛɛ nafa ka bon kosɔbɛ. An bena kuma o lo koo la tilanyɔrɔ nin na. O baara be mɔgɔ miliyɔn caaman dɛmɛna duniɲa kuru bɛɛ kɔnɔ k’a ye ko Ala ka Masaya ye tiɲɛnko ye.