O YADRA vakamataka, o vakavakarau sara mo gole ena cakacaka vakaitalatala ena dua na siga o cegu kina mai na cakacaka. O lomalomarua, o wawale tale ga. O vinakata dina mo vakacegu! Ia o masulaka, o qai vakadeitaka mo gole mada ga. Drau cakacaka vata sara kei na dua na ganeda yalodina sa itabaqase, qai tarai iko na nona yalovinaka kei na nona vosota. Ni o vunautaka na ka dina e veivale, o vakasamataka sara nira vunau tale tiko ga va qori na tacimu e veiyasa i vuravura, e tautauvata na ivola eda vakayagataka kei na ka eda vakavulici kina. Ni o lesu i vale, o vakila ni vaka e soli tale vei iko e dua na igu. O marau sara ga ni o sega ni tiko ga e vale!

Na cakacaka vakaitalatala e cakacaka bibi duadua ni Matanitu ni Kalou ena gauna qo. E parofisaitaka o Jisu ni na vakatubuqoroqoro na ivakatagedegede ni cakacaka vakavunau ena iotioti ni veisiga. (Maciu 24:14) Sa vakayacori vakacava nona parofisai? Eda na dikeva ena iwasewase qo se o cei era na vunau, na iwalewale kei na iyaragi e laulau mera vukei kina na milioni vakacaca ena veiyasa i vuravura mera vakabauta ni dua dina na matanitu na Matanitu ni Kalou.