KO A katauraoi ibukin te mwakuri ni minita ni moaningabongin am bong ni motirawa n am mwakuri ni kareketianti. Ko baenikai moa bwa ko namakina te kua teutana. E taraa n rangi ni katikitiki te motirawa n te moaningabong anne! Ma ko a tataroakinna ao ko a iangoa mwanangam. Ko toa ma te tari te aine ae kakaonimaki ae e a kara, ao e ringaki nanom n nanomwaakana ma akoina. Ngke ko a tibwaa rongorongon te koaua man te auti teuana nakon teuana, ko ataia ae iai taari mwaane ao aine ni katobibia te aonnaba aika tibwaa naba te rongorongo anne, ao a kabongana te boki naba anne ao a kakabwaiaaki naba man te kataneiai ae tii te arona. Ko namakina te korakora ngke ko a okira mwengam. Ko rangi ni kukurei ngke ko aki tiku ni mwengam!

Ni boong aikai, te mwakuri ni minita ni Kristian bon te mwakuri ae kakawaki ibukin ana Tautaeka n Uea te Atua. E a kaman taekinna Iesu bwa e na kabatiaaki karaoan te mwakuri n uarongorongo ni kabaneani boong. (Mat. 24:14) E kangaa ni kakoroaki bukin ana taetae ni burabeti? N te mwakoro aei ao ti na nenera taekaia aomata, taian anga, ao bwaai ni mwakuri aika rangi ni kakawaki n te mwakuri ni minita ni Kristian, ae e buokiia mirion ma mirion aomata ni katobibia te aonnaba bwa a na onimakina ana Tautaeka n Uea te Atua.