MAYSA nga agsapa, agsagsaganaka a mapan mangasaba ta awan ti serrekmo iti trabaho. Ngem kasla aglaladutka ta nabambannogka. Kasla nagmayat ti aginana! Ngem nagkararagka ket inkeddengmo ti rummuar. Nakikaduaka iti nataengan ken matalek a kabsat a babai ket natukay ti pusom iti panagibtur ken kinaimbagna. Ken bayat nga iranranudmo ti mensahe ti kinapudno iti binalaybalay, naamirismo a dagiti kakabsatmo iti intero a lubong ikaskasabada ti isu met laeng a mensahe, us-usarenda ti isu met laeng a literatura, ken agpapada ti maaw-awatyo a pannakasanay. Idi nakaawidka, gimmanaygayka. Imbag laengen ta rimmuarka!

Ita, ti Nakristianuan a ministerio ti kangrunaan a trabaho ti Pagarian ti Dios. Impadto ni Jesus a ti trabaho a panangasaba ket agsaknap iti intero a daga iti maudi nga al-aldaw. (Mat. 24:14) Kasano a natungpal dayta? Iti daytoy a benneg, adalentayo ti maipapan iti ili ti Dios, dagiti pamay-an ken alikamen nga inusarda a nakapatpateg iti Nakristianuan a ministerio, a makatulong iti minilion a tattao iti intero a lubong a mangkita nga agpaypayso ti Pagarian ti Dios.