WHỌ gwọlọ kpohọ usiuwoma evaọ ohiohiẹ ẹdẹjọ nọ who kpohọ iruo ho. Rekọ o be ruọ owhẹ oma tere he keme oma o be dina rrọ owhẹ. Oma u bi ru owhẹ nọ who serihọ. Kẹsena whọ tẹ lẹ kpahe onana jẹ gbaemu nọ who re kpohọ usiuwoma na. A te dhe owhẹ kugbe oniọvo-ọmọtẹ jọ nọ ọ kpako no nọ o kruga ziezi, omodawọ riẹ evaọ egagọ Ọghẹnẹ gbe ẹwo riẹ i duobọte owhẹ udu. Nọ whọ be ta usiuwoma n’uwou ruọ uwou na, whọ tẹ kareghẹhọ nọ ibe Ileleikristi ra wariẹ akpọ na họ a bi ru iruo evona, be rọ oghẹrẹ ebe evona nọ e rrọ owhẹ obọ na wuhrẹ amọfa, yọ oghẹrẹ ovona a wuhrẹ owhai kpobi kẹ iruo na. Oma o jọ owhẹ sasasa nọ who te uwou no. Oma o tẹ be were owhẹ inọ Ọghẹnẹ o ru nọ who ro kpohọ usiuwoma.

Obọnana, usiuwoma ota na họ iruo nọ e mai wuzou nọ Uvie Ọghẹnẹ o be tẹrovi. Jesu ọ ta nọ a te ta usiuwoma na nya akpọ na soso duwu evaọ edẹ urere na. (Mat. 24:14) Ẹvẹ eruẹaruẹ nana i bi ro rugba? Evaọ abọ avọ 2 nana, ma te ta kpahe ahwo nọ a be ta usiuwoma na, idhere nọ a be rọ tae, gbe ekwakwa nọ a bi ro ru onana, onọ u bi fiobọhọ kẹ ima ahwo buobu evaọ akpọ na riẹ nọ Uvie Ọghẹnẹ o ginẹ rrọ.