YO KELE kilumbu na nge ya konzie, nge ke yilama sambu na kisalu ya kusamuna. Nge ke zo basika kansi nitu ke zola ve. Nzala nde nge pema ka nge, mwa mpongi ya suka ta sala nge mbote na nitu! Kansi, na nima ya kusala kisambu, nge me baka lukanu ya kubasika na kisalu ya kusamuna. Nge ke samuna ti mpangi-nkento mosi ya mununu mpi ya kwikama. Kukanga-ntima mpi ntima na yandi ya mbote me simba ntima na nge. Ntangu beno ke samuna nsangu ya kieleka nzo na nzo, nge me yibuka nde bampangi na nge ya babakala mpi ya bankento na ntoto ya mvimba ke samuna nsangu yina mosi ya kieleka, bo ke sadila mikanda ya beno ke sadila, mpi ke baka malongi ya mutindu mosi. Ntangu nge me vutuka na nzo, nge ke wa nitu kikesa. Nge me sepela mingi kibeni mutindu nge bikalaka ve na nzo!

Bubu yai, kisalu ya kusamuna yina Bakristu ke salaka kele kisalu ya ntete ya Kimfumu ya Nzambi. Yezu tubaka na ntwala nde, na bilumbu ya nsuka, bo ta sala kisalu ya kusamuna na ntoto ya mvimba. (Mat. 24:14) Inki mutindu mbikudulu yai me lunganaka? Na kitini yai beto ta tadila bantu, mitindu, mpi bisadilu yina vandaka mfunu na kisalu ya kusamuna, mpi yina ke sadisa bamilio ya bantu na ntoto ya mvimba na kumona nde Kimfumu ya Nzambi kele kima mosi ya kieleka.