EIE ua di iudika selu phala kuia mu ukunji mu kizuua kiê kia ku nhoha ku salu. Eie uala ni hele, mukonda ua bhuila. Ua mesena ku zeka dingi! Maji eie u samba, anga u banza kuia muene mu boka. Eie u boka ni phange ia muhatu ua fiiele ua kuka kiá, maji o nguzu ni ukexilu uambote ua muadiakimi iú u ku suínisa dingi. Kioso ki uia ni ku boka o njimbu inzo ni inzo, u mona kuila o phange jê ku mundu uoso a mu bhanga uá o kikalakalu kiki, a mu bhana uá o madivulu u ua mu bhana eie, ni kuila o ulongelu u uene mu tambula uene ué uene mu tambula ene. Kioso ki u bhixila kubhata, eie u divua kiambote. Eie u sanguluka kiavulu mukonda dia kuia ku boka!

Lelu, o ukunji uetu uene o kikalakalu kia beta o kota phala o Utuminu ua Nzambi. Jezú ua kanene kuila o kikalakalu kia kuboka eji ki bhanga ku mundu uoso mu izuua isukidila-ku. (Mat. 24:14) Kiebhi kiene mu dikumbidila o kikanenu kiki? Mu kibatu kiki, tua-nda mona o mundu, o maukexilu’â a ku boka, ni jifalamenda ja beta kota jene mu a kuatekesa mu ukunji uâ, ni ku kuatekesa mazunda a athu ku mundu uoso ku mona kuila o Utuminu ua Nzambi ua kidi muene.