MU KUBAMA wina mu kwenda mu salu kia umbangi muna lumbu kina kukwendanga ku salu ko. Kansi, obakamene kwa lukatikisu yo mona wolo. Muna mene i ntwangwa yambote kikilu ya vunda. Osambidi mu kuma kia diambu diadi yo bak’e nzengo za kwenda. Ovaikidi yo mpangi ankento anunu wa nkwa kwikizi. O luzindalalu ye ngemba zandi zisimbidi kikilu o ntim’aku. Ekolo osamunanga e ludi mu nzo ye nzo, obakwidi vo mpangi zaku mpe mu nza yawonso, nsangu zau zimosi besamunanga, nkanda miau mimosi besadilanga ye awonso mpila mosi belongelwanga. I bosi, ovutukidi kuna nzo, e kiese kiaku kiwokele. Ovutwidi matondo wau obakidi nzengo za lembi vwanda kuna nzo.

Mu lumbu yeto, e salu kia samuna nsangu zambote i salu kisundidi o mfunu kisalanga Kintinu kia Nzambi. Yesu wasakula vo e salu kia umbangi kitoma nungunuka mu lumbu yambaninu. (Mat. 24:14) O ungunza wau aweyi ulunganenanga? Omu kunku kiaki tufimpa o nkangu, ndekwa ye sadilwa ina vo yamfunu kikilu muna salu kisalanga Akristu, eki kisadisanga ulolo wa wantu mu nza yawonso mu badikila Kintinu kia Nzambi vo kiakieleka.