MAMS-Y tɩ rũndã daarã yãmb pa tʋmd ye. Y segenda y meng n na n tɩ moon koɛɛgã, la y yamã yooda y sã n na n tõogame, bala y yaame. Y nongẽ-lame n vʋʋse. Y pʋʋsa a Zeova, n yãk yam n na baas n tɩ moon koɛɛgã. Y sɩd yiime, n paam n moon ne saam-bi-poak sẽn kʋʋle, n tũud a Zeova yʋʋm wʋsgo. A sũ-marã la a nonglmã yɩ-y-la noogo. Y sẽn wa n moond koɛɛgã zak-zakã, y tẽegame tɩ yaa koe-yɛngã la saam-biisã moond dũniyã gill zugu, ne sɛb nins yãmb me sẽn tar n moondẽ wã, la tɩ y fãa paamda zãmsg a ye sẽn na yɩl n moon koɛɛgã sõma. Y sẽn moon n sa n kuilã, y yaamsã fãa menemame. Y sũurã sɩd nooma wʋsg y sẽn tõog n yi n moonã.

Rũndã-rũndã, tʋʋmd ning kiris-nebã sẽn tʋmd n yɩɩd yaa Wẽnnaam Rĩungã koɛɛg moonego. A Zezi ra yeelame tɩ yaoolem dayã, koɛɛgã na n taa dũniyã zĩig fãa. (Mat. 24:14) Wãn to la rẽ paam pidsgu? Sags a naasã sẽn pʋgdã pʋgẽ, d na n goma koe-moondbã meng yelle, b moonegã manesem, la tʋʋm-teed nins b sẽn tallã me yelle. D na n yãame tɩ rẽ fãa talla yõod wʋsg koɛɛgã mooneg pʋgẽ, bala sõnga neb milyõ rãmb tɩ b bãng tɩ Wẽnnaam Rĩungã sɩd beeme.