NATU tye nduno oto ilongekidhile uukalele ongulonene. Ihe owu uvite wa fa wa loloka kashona noto dhiladhila wu kothe po ishewe. Ihe sho wa galikana owa tokola wu ye muukalele. Owa longo pamwe nomwiitaali omukokele ngoka a kala ta longele Jehova omimvo nomimvo. Eidhidhimiko lye nolukeno lwe oye ku tsu omukumo. Sho tu uvitha egumbo negumbo owa dhimbulukwa kutya ooitaali ooyakweni muuyuni awuhe otaya ningi sha faathana, taya longitha iileshomwa ya faathana nohaya dheulwa sha faathana. Sho wa shuna kegumbo owu uvite wu na oonkondo nowa nyanyukwa sho inoo kala pegumbo!

Iilonga yokuuvitha Uukwaniilwa waKalunga oyo ya simanenena kunena. Jesus okwa hunganekele kutya momasiku gahugunina iilonga yokuuvitha otayi ka longwa muuyuni awuhe. (Mat. 24:14) Ehunganeko ndika olya gwanithwa ngiini? Moshitopolwa shika otatu ka kundathana kombinga yaantu, yomikalo noyiilongitho mbyoka ya kala nokulongithwa muukalele okukwathela aantu omamiliyona ya mone kutya Uukwaniilwa waKalunga epangelo lyolela.