АБОН дын у улӕфты бон. Ды райсомӕй раджы сыстадтӕ ӕмӕ дӕхи уацамындмӕ цӕттӕ кӕныс. Ӕцӕг, иуафон ахъуыды кодтай: «Мӕнӕ цы фӕллад дӕн, уӕдта абон ма ацӕуин. Иу гыццыл ма куы афынӕй кӕнин, уӕд цы хорз уаид». Фӕлӕ Йегъовӕмӕ скуывтай ӕмӕ дӕхицӕн загътай, цыфӕндыйӕ дӕр хъуамӕ ацӕуон, зӕгъгӕ. Уыцы бон хъусын кӕныс иу ацӕргӕ иузӕрдион хоимӕ. Уыныс ӕй, куыд фидар у ӕмӕ адӕмимӕ куыд фӕлмӕн ныхас кӕны, ӕмӕ дӕхӕдӕг дӕр бафидар дӕ. Хӕдзарӕй-хӕдзармӕ цӕут ӕмӕ адӕмӕн рӕстдзинады тыххӕй дзурут. Ӕмӕ уыцы рӕстӕг ахъуыды кодтай, зӕгъгӕ, цы диссаг у, ныртӕккӕ дунейы алы рӕтты мӕ хотӕ ӕмӕ ме ’фсымӕртӕ дӕр ацы хабар хъусын кӕнынц, ахӕм литературӕ парахат кӕнынц ӕмӕ уыдон дӕр архайынц, не ’мбырдты нӕ цӕуыл ахуыр кӕнынц, уымӕ гӕсгӕ. Фӕстӕмӕ хӕдзармӕ афтӕ уӕнгрогӕй ӕрбаздӕхтӕ, ӕмӕ дӕ фӕллад дӕр цыдӕр фӕци. Ӕмӕ цин кӕныс, хӕдзары кӕй нӕ баззадтӕ, ууыл.

Абон Хуыцауы Паддзахадӕн йӕ сӕйраг куыст у хорз хабар хъусын кӕнын. Йесо загъта, фӕстаг бонты хорз хабар ӕгас зӕххыл дӕр хъуыстгонд кӕй цӕудзӕн (Матф. 24:14). Куыд ӕххӕст кӕнынц йӕ ныхӕстӕ? Абон хорз хабар хъуыстгонд цӕуы ӕгас дунейы дӕр, ӕмӕ уый фӕрцы милуанты фидарӕй уырны, Хуыцауы Паддзахад ӕцӕг хицауад кӕй у, уый. Нӕ чиныджы ацы хайы ӕркӕсдзыстӕм, хорз хабар чи хъусын кӕны, стӕй цавӕр мадзӕлттӕй ӕмӕ цавӕр кусӕнгӕрзтӕй пайда кӕнынц, уымӕ.