Mukukhunganyika toera kuenda mu utumiki pa ntsiku yakupuma pa basa ya kudziko. Musanyinyirika pang’ono thangwi mwaneta pang’ono. Kupuma namacibese kusaoneka ninga kwadidi kakamwe! Mbwenye musaphembera mbamutonga kuenda mu utumiki. Mwabuluka mu utumiki na mulongo wakukhulupirika wakugwesera, pontho kupirira na kukoma ntima kwace kusakukhuyani kakamwe. Munamwaza imwe mphangwa za undimomwene nyumba na nyumba, musakumbuka kwa imwe kuti abale na alongo pa dziko yonsene akumwaza mphangwa zibodzi zene, mbaphatisira mabukhu mabodzi ene, onsene asaphindula na cipfundziso cibodzi cene. Mu kupita kwa ndzidzi mwabwerera kunyumba, musapibva kuti muli na mphambvu. Muli wakutsandzaya kakamwe thangwi mwabuluka mu utumiki!

Mu ndzidzi uno, utumiki Wacikristu ndi basa yakutoma ya Umambo wa Mulungu. Yezu alongeratu kuti basa yakumwaza mphangwa mbidacita khundu ikulu mu ntsiku zakumalisa. (Mat. 24:14) Kodi profesiya ineyi isakwanirisika tani? Mu khundu ino, tinadzadinga mbumba, njira, na maferamentu akuti akhala akufunika kakamwe mu utumiki Wacikristu, akuti asaphedza pikwi na pikwi pya anthu pa dziko yonsene toera kuona kuti Umambo wa Mulungu ndi wandimomwene.