ఈ రోజు మీ ఆఫీసుకు సెలవు. కాబట్టి పరిచర్యకు వెళ్లాలని సిద్ధపడుతున్నారు. కానీ కొంచెం అలసటగా అనిపించి, పరిచర్యకు వెళ్లాలా వద్దా అని ఆలోచిస్తున్నారు. ఇంట్లో ఉండి కాస్త విశ్రాంతి తీసుకుంటే బాగుండు అని మీ మనసుకు అనిపిస్తుంది. కానీ ప్రార్థన చేసుకుని, ఎలాగైనా పరిచర్యకు వెళ్లాలని నిర్ణయించుకున్నారు. చాలాకాలం నుండి నమ్మకంగా సేవచేస్తున్న ఒక వృద్ధ సహోదరితో మీరు పరిచర్య చేశారు. ఆమెకున్న ఓర్పు, దయ మిమ్మల్ని ఎంతో పురికొల్పాయి. ఇంటింటికి వెళ్తూ రాజ్య సందేశాన్ని ప్రకటిస్తుండగా, ప్రపంచవ్యాప్తంగా ఉన్న మీ సహోదరసహోదరీలు కూడా ఇదే సందేశాన్ని ప్రకటిస్తున్నారని, ఇవే ప్రచురణల్ని అందిస్తున్నారని, ఇలాంటి శిక్షణే పొందుతున్నారని మీరు గ్రహించారు. పరిచర్య ముగించుకుని ఇంటికి వచ్చేసరికి మీకు కొండంత బలం వచ్చినట్లు అనిపించింది. ఇంటి దగ్గరే ఉండిపోకుండా, పరిచర్యకు వెళ్లినందుకు మీరు చాలా సంతోషించారు!

ప్రస్తుతం దేవుని రాజ్యం చేస్తున్న ముఖ్యమైన పని పరిచర్యే. చివరి రోజుల్లో ప్రకటనా పని ఎంత విస్తృతంగా జరుగుతుందో యేసు ముందే చెప్పాడు. (మత్త. 24:14) ఆ మాటలు ఎలా నెరవేరాయి? ఈ భాగంలో, పరిచర్య చేసిన ప్రజల గురించి, వాళ్లు ఉపయోగించిన పద్ధతుల గురించి, పరికరాల గురించి పరిశీలిస్తాం. ఆ పరిచర్య వల్ల, ప్రపంచవ్యాప్తంగా లక్షలమంది ప్రజలు దేవుని రాజ్యం వాస్తవమైనదని తెలుసుకోగలుగుతున్నారు.