U KARI u ti longisela kuya sinwini hi siku legi u nga yiko ntirweni wa wena wa kutihanyisa. Wa kanakana hi lezi u ti zwako na u karelenyene. U navela ku tlhela u ya etlela! Kanilezi u khongela hi mhaka leyo zonake u boha ku famba. U tira ni makabye wa xisati wo tsumbeka a khosaheleko, niku a wunene ni kutimisela kakwe za ku khumba nguvu. A xikhati lexi u hlengelako ni vanwani a mahungu ya lisine hi muti ni muti, u alakanya lezaku a vamakabye va wena misaveni yontlhe va hlengelawu kuhangalaseni ka mahungu yalawa ya manwe, na va tirisa a mabhuku yalawa ya manwe, na va vuneka hi gonziselelo yaleyi ya yinwe kambe. A xikhati lexi u tlhelako kaya, u tizwa na u tiyile. Wa tsaka nguvu hi lezi u nga kala ku tshama kaya!

Inyamutlha, a wutireli ga wuKristu hi gona ntiro-tshinya wa Mufumo wa Nungungulu. Jesu i profetile lezaku a ntiro wa kuxumayela wu wa ta mahiwa hi ndlela yo hlamalisa masikwini yo gumesa. (Mat. 24:14) Xana a xiprofeto lexi xi tatisekisa kuyini? Ka xipanze lexi hi ta wulawula hi vanhu, tindlela, ni zitiro za lisima nguvu wutirelini ga wuKristu lezi zi vunako vanhu va timiliyoni misaveni yontlhe a ku wona lezaku a Mufumo wa Nungungulu ngwa lisine.