CHIGAŴA 2
Kupharazga vya Ufumu—Kupharazga Makani Ghawemi pa Charu Chose
TIYELEZGERE kuti muli pa holide, ndipo mulenji mukunozgekera kukapharazga. Kweni mukugongowa chifukwa mwavuka. Mukuŵa nga mungakhala waka kuti mupumure. Kweni mwati mwalomba, mukughanaghana vyakuti mulute kukapharazga. Mu uteŵeti mwenda na mudumbu muchekuru, ndipo mwakhozgeka chomene chifukwa ngwalusungu kweniso wazizipizga vinandi. Uku mukupharazga nyumba na nyumba, mukukumbuka kuti ŵabali na ŵadumbu pa charu chose nawo ŵakuchita mulimo wenewuwu, ndipo tose tikupharazgira mabuku ghakuyana waka, na kulondezga ulongozgi wakuyana waka. Mwati mwawelera ku nyumba mukusanga kuti vyakulema vyose vyamara. Ndipo mwakondwa chomene kuti mwanguluta kukapharazga.
Mulimo ukuru wa Ŵakhristu ŵaunenesko nkhupharazga vya Ufumu wa Chiuta. Yesu wakati chimanyikwiro chimoza cha mazuŵa ghaumaliro, ni mulimo wa kupharazga makani ghawemi gha Ufumu. (Mat. 24:14) Kasi uchimi uwu wafiskika wuli? Mu chigaŵa ichi, tisambirenge vya ŵanthu awo ŵakuchita mulimo uwu, nthowa zakupharazgira, kweniso ivyo vikuŵawovwira kuti ŵafiske mulimo wakuzirwa chomene uwu. Mulimo uwu ukovwira ŵanthu pa charu chose kuti ŵaumanye makora Ufumu wa Chiuta.
MU CHIGAŴA ICHI
MUTU 6
Awo Ŵakupharazga—Ŵateŵeti Ŵakujipeleka na Mtima Wose
Chifukwa wuli Yesu wakaŵa na chigomezgo chose kuti waŵenge na ŵanthu ŵakujipeleka mu mazuŵa ghaumaliro? Kasi mungalongora wuli kuti mukupenja dankha vya Ufumu?
MUTU 7
Nthowa Zakupharazgira—Tikuchita Chilichose Kuti Tipharazgire Ŵanandi
Wonani nthowa izo ŵanthu ŵa Chiuta ŵakupharazgira kuti ŵafikire ŵanandi pambere umaliro undafike.
MUTU 8
Ivyo Vikutovwira Pakupharazga—Mabuku Agho Ghakovwira pa Charu Chose
Kasi ntchito yithu ya kung’anamura yikulongora wuli kuti Yesu wakutovwira? Kasi ni fundo wuli za mu mabuku ghithu izo zikulongora kuti Ufumu wa Chiuta uliko nadi?
MUTU 9
Ivyo Vyachitika Chifukwa cha Kupharazga—“Minda . . . Yacha Kale Kuti Yivunike”
Yesu wakasambizga ŵasambiri ŵake vinthu viŵiri vyakuzirwa pa nkhani ya mulimo ukuru wa vuna yauzimu. Kasi vinthu ivi vikutikhwaska wuli nase mazuŵa ghano?
