KO FAKATOKA koe ki te galuega talai i te tafataeao ‵malu i tou aso malōlō mai tau galuega ‵togi. Ko tai fakatuatuai koe, kae fi‵ta malie. Ko oko eiloa i te gali aka ke malōlō koe i te taeao tenā! Kae e ‵talo atu koe e uiga ki ei kae fakaiku aka ke fanatu i te galuega talai. Ko ga‵lue koe mo se tuagane matua fakamaoni, kae ne otia eiloa tou loto i tena kufaki mo tena atafai. Kae i te taimi e fakaasi atu ei ne koe a te fekau o te munatonu mai fale ki fale, e foliga mai ki a koe me e fakaasi atu foki ne ou taina mo tuagane a te fekau foki tenei, e ‵pau foki a te tusi e fakaaoga, kae e maua foki ne tino katoa a mea mai te akoakoga foki eiloa e tasi. I te taimi e oko atu ei koe ki te fale, ko se faka‵tau eiloa i tou malosi. Ko fiafia malosi koe me ne seki nofo atu koe i te fale!

I aso nei, a te galuega talai faka-Kelisiano ko te galuega fakavae eiloa o te Malo o te Atua. Ne ‵valo mai ne Iesu me ka fakataunu eiloa i se auala fakaofoofogia a te galuega talai i te lalolagi i aso fakaoti. (Mata. 24:14) Ne fakataunu pefea tena valoaga? I te vaega tenei, ka iloilo aka ne tatou a tino, auala, mo mea faigaluega kolā ne tāua ‵ki ki te galuega talai faka-Kelisiano, telā e fesoasoani atu ki te fia miliona o tino i te lalolagi kātoa ke ‵kilo atu ki te Malo o te Atua e pelā me se mea tonu.