KETEKE liepuyuko kupange wove woku sanda eteku, o lipongiya selo oco wende kupange woku kunda. Pole, o sumasuma omo liekavo. Momo o yongola oku puyukapo vali kamue! Pole, noke lioku likutilila, o nõlapo oku enda kupange woku kunda. Kuenje wa nõliwa oco o talavaye la manji umue ukãi wa kuka ukuekolelo kuenda o vetiyiwa lepandi kuenda ocikembe caye. Osimbu u kasi oku kundila esapulo liocili konjo lanjo, ivaluka okuti, vamanjove voluali luosi va kasivo oku kunda esapulo liaco, loku eca komanu alivulu amuamue, kuenda vosi va kuatisiwa lepindiso limuamue. Eci o tiukila konjo, o limbuka okuti wa pamisiwa. O kuata esanju omo lioku yuvula oku usala konjo!

Koloneke vilo, upange woku kunda owo upange wa velapo Wusoma wa Suku. Yesu wa popele hati, upange woku kunda u ka lisanduila kolonepa viosi vokuenda kuoloneke via sulako. (Mat. 24:14) Ocitumasuku eci ca siata oku tẽlisiwa ndati? Vonepa yilo, tu konomuisa eci catiamẽla komanu, kolonjila tua siata oku kuama poku kunda kuenda ndomo ovimalẽho tua siata oku talavaya lavio vi kasi oku kuatisa omanu oku limbuka okuti Usoma wa Suku wocili.