ADLAW han imo day off. Nangangandam ka hin temprano basi magsangyaw. Pero nag-alang ka anay tungod kay kapoy ka. Baga hin kaopay unta magpahuway! Kondi nag-ampo ka mahitungod hito ngan nagdesisyon pagsangyaw. Nakapartner mo an usa nga matinumanon nga edaran na nga bugto, ngan nabantad ka han iya pagpailob ngan pagkabuotan. Ngan samtang nagbabalay-balay kamo, nahunahuna mo nga an kabugtoan ha bug-os nga kalibotan nagsasangyaw han pariho nga mensahe, nagamit han pariho nga literatura, ngan nagpapahimulos han pariho nga pagbansay. Ha imo pag-uli, inabat mo nga narepreskohan ka. Nalipay ka gud nga waray ka magpabilin la ha balay!

Ha pagkayana, an ministeryo an nangunguna nga buruhaton han Ginhadian han Dios. Igintagna ni Jesus nga ha kataposan nga mga adlaw, an pagsangyaw nga buruhaton makakaabot tubtob ha kahigrayoan. (Mat. 24:14) Paonan-o natutuman ini nga tagna? Hini nga seksyon, aton paghihisgotan an mga tawo, pamaagi, ngan garamiton nga importante gud ha aton ministeryo nga nabulig ha minilyon ha bug-os nga kalibotan ha paghibaro nga tinuod an Ginhadian han Dios.