MBALI 2
Kulalicila ya Ucimwene—Kuwandisya Ngani Syambone Pacilambo Cosope
TUWANICISYE kuti akukosecela yakwawula mu undumetume kundaŵi palisiku lyakusapumula kwawula kumasengo. Nambo akugwa ulesi ligongo lyakulipikana mpela apesile. Kwa wawojo kundaŵiku kukuwoneka kuŵa kwambone kupumula. Nambo akupopela, kaneko akusimicisya yakwawula mu undumetume. Mu undumetumemo akwenda yalumo ni mlongo jwakulupicika jwacikulile. Wawojo akutenda lung’wanu ni kupilila soni umbone mtima wakwe. Pakulalicila usyesyene kunyumba ni nyumba, akukumbucila kuti abale ni alongo pacilambo cosope akukamulasoni masengoga pakamulicisya masengo mabuku gakugakamulicisya masengo wawojo, soni kuti majiganyo gakulandana gaŵapocele gakwakamucisya wosope. Payice kunyumba akusangalala ligongo lyakuti ŵajinjile mu undumetume.
Masiku agano, masengo gakusosekwa mnope mu Ucimwene wa Mlungu gali kulalicila. Yesu jwasasile mkanipaŵe kuti masengo gakulalicila gaciŵa gamakulungwa mnope m’masiku gambesi. (Mat. 24:14) Ana cakulocesyaci cikwanilicikwe mwamtuli? Mu mbali ajino citulole yaŵele ali mkutenda ŵandu, matala gaŵele ali mkugakamulicisya masengo, soni yida yayiŵele yakusosekwa mnope pamasengo gakulalicilaga. Yindu yeleyi yikwakamucisya ŵandu ŵajinji pacilambo cosope kuti awuwoneje Ucimwene wa Mlungu kuŵa usyesyene.
MU MBALI AJI
MTWE 6
Ŵakulalicila—Ali Ŵakutumicila Ŵakusalipeleka Acimsyene
Ana ligongo cici Yesu jwakwete cikulupi cakuti cacikola ŵandu ŵacacilipeleka acimsyene m’masiku gambesi? Ana mpaka alosye camtuli kuti akusosasosa Ucimwene candanda?
MTWE 7
Matala Gakulalicilila—Kamulicisya Masengo Matala Gakulekanganalekangana Pakulalicila
Alijiganye matala gasambano gele ŵandu ŵa Mlungu aŵele ali mkamulicisya masengo pakwalalicila ŵandu ŵajinji ngani syambone mbesi mkanijiyice.
MTWE 8
Yida Yakulalicilila—Kukoposya Mabuku Gakulalicilila Pacilambo Cosope
Ana masengo getu gakugopolela galosisye camtuli kuti Yesu akutukamucisya? Ana ni yakutendekwa yapi yakwaya mabuku getu yayikwatendekasya wawojo kusimicisya kuti Ucimwene uli usyesyene?
MTWE 9
Yakuyicisya ya Masengo Gakulalicila—“Mbeju Sikomele . . . Kuti Asigowole”
Yesu ŵajiganyisye ŵakulijiganya ŵakwe yiwundo yiŵili yakusosekwa yakwamba masengo gekulungwa gakugowola mwausimu. Ana yiwundo yeleyi yikutukwaya camtuli m’weji masiku agano?
