JUNPʼÉEL jaʼatskab maʼ ta bin meyajeʼ ka líiʼskaba utiaʼal a bin kʼaʼaytaj. Baʼaleʼ ka wuʼuyik jach kaʼanaʼanech yéetel ka wuʼuyik taak a pʼáatal jeʼelel. Baʼaleʼ ka beetik túun a payalchiʼ, tsʼoʼoleʼ ka bin. Ka tsʼaʼabal meyaj yéetel juntúul kiik úuch káajak u meyajtik Jéeoba, ken a wil bix u meyajtik yéetel chúukaʼan óolal yéetel bix u yeʼesik u yutsileʼ ku beetik a tuklik: «Bejlaʼeʼ yaʼabkach sukuʼunoʼob yéetel kiikoʼob tiʼ tuláakal yóokʼol kaab táan xan u kʼaʼaytikoʼob le maʼalob péektsiloʼ, táan u meyajtiʼob xan le jóoʼsaʼanil ku meyajtenoʼ yéetel junpʼéeliliʼ bix k-kaʼansaʼal kʼaʼaytaj». Le ken suunakech ta wotocheʼ kiʼimak a wóol úuchik a jóokʼol kʼaʼaytaj, mix ta wuʼuyik wa kaʼanaʼanechiʼ.

Teʼ kʼiinoʼobaʼ le kʼaʼaytajoʼ letiʼe meyaj maas kʼaʼanaʼan ku nuʼuktaʼal tumen u Reino Diosoʼ. Jesuseʼ tu yaʼaleʼ teʼ tu tsʼook kʼiinoʼobaʼ le maʼalob péektsiloʼ yaan u kʼaʼaytaʼal tiʼ tuláakal yóokʼol kaab (Mat. 24:14). ¿Bix u béeytal le profecíaaʼ? Teʼ jaats tiʼ le libroaʼ yaan k-tʼaan tiʼ le máaxoʼob tsʼoʼok u táakpajloʼob teʼ meyajaʼ, bix tsʼoʼok u kʼaʼaytajoʼob yéetel baʼaxoʼob meyajnajtiʼob utiaʼal u beetkoʼob. Tuláakal lelaʼ tsʼoʼok u yáantik u millonesil máakoʼob tiʼ tuláakal yóokʼol kaab utiaʼal ka u yiloʼob jach tu jaajil táan u meyaj u Reino Dios.