今日你唔使返工，朝早起身，諗住去傳道，但係覺得有啲攰，噉去唔去好呢？如果可以休息半日就好嘞！你向上帝禱告，之後仲係決定去。你嘅傳道同伴係一位忠心嘅年長姊妹，佢堅忍不拔、和藹仁慈嘅態度打動咗你嘅心。你哋逐家逐户傳講王國真理嗰時，你諗到全球嘅弟兄姊妹都喺度宣揚同一個信息，分發一樣嘅書刊，接受同樣嘅培訓而得到益處。返到屋企，你精神百倍，真係慶幸自己冇留喺屋企！

今日，上帝嘅王國委派俾基督徒嘅首要任務就係傳道。耶穌預告喺最後嘅日子，傳道工作會不斷擴展，規模之大令人驚奇。（馬太福音24:14）呢個預言點樣應驗呢？傳道工作可以令千百萬人睇出，上帝嘅王國係真實嘅。呢篇會講吓傳道嘅人、傳道嘅方法同埋傳道嘅工具。要完成傳道任務，呢三樣都係非常重要嘅。